ఈ సంవత్సరం నాలుగు పెద్ద సినిమాలు విడుదల కానున్నాయి. అవి ఒక్క తెలుగులోనే కాకుండా మిగతా భాషల్లో కూడా విడుదలవుతున్నాయి. ఈ నాలుగు సినిమాల్లో రెండు సినిమాలు విడుదల తేదీలు, ప్రచారాలు అప్పుడే మొదలు పెట్టేసారు. ఇంకో రెండు సినిమాలు ఇంకా చిత్రీకరణ దశలోనే వున్నాయి, కానీ ఆ రెండు సినిమాలు కూడా ఈ సంవత్సరమే విడుదలవుతున్నాయి. ఈ నాలుగు సినిమాలకి పెట్టిన బ్జడెట్‌ వీటిపై వచ్చే వ్యాపారాలు సుమారు రూ. రెండువేల కోట్లకి పైగా ఉంటుందని ట్రేడ్‌ విశ్లేషకుల అభిప్రాయం. ఇంతకీ ఈ నాలుగు సినిమాలు ఏవంటే, ముందుగా జూన్‌ 27 న విడుదలవుతున్న 'కల్కి 2898 ఏడి’. ఇందులో ప్రభాస్‌ కథానాయకుడు కాగా, అమితాబ్‌ బచ్చన్‌, కమల్‌ హాసన్‌, దీపికా పదుకొణె, దిశా పటాని, ఇంకా చాలామంది నటీనటులు వున్నారు.

ఇది ఒక సైన్స్‌ ఫిక్షన్‌ కథ అని చెపుతున్నారు. నాగ్‌ అశ్విన్‌ దర్శకుడు కాగా, అశ్విని దత్‌ నిర్మాత. ఈ సినిమాకి సుమారు రూ. 600 కోట్లు బడ్జెట్‌ అయిందని వార్తలు వస్తున్నాయి. ఇక రెండో సినిమా 'పుష్ప 2: ది రూల్‌’. ఇది ఆగస్టు 15న విడుదలవుతోంది. అల్లు అర్జున్‌, రష్మిక మందన్న జంటగా నటిస్తున్న ఈ సినిమాకి సుకుమార్‌ దర్శకుడు. ఇది 'పుష్ప: ది రైజ్‌’ అనే సినిమాకి సీక్వెల్‌ గా అంటే రెండో భాగంగా వస్తోంది. ఈ సినిమాపై భారీ అంచనాలు వున్నాయి. ఈ సినిమా ఓటిటి హక్కులు నెట్‌ ప్లిక్స్‌ ఇప్పటికే రూ.275 కోట్లకి తీసుకుందని వార్తలు వచ్చాయి. అలాగే ఈ సినిమా హిందీ హక్కులు అనిల్‌ తడాని రూ. 200 కోట్లకు తీసుకున్నారని ఇంకో వార్త కూడా వచ్చింది. ఈ సినిమా మొదటి భాగం హిందీలో సుమారు రూ.125 కోట్ల వ్యాపారం చేసింది కాబట్టి, ఇప్పుడు రెండో భాగం అంతకన్నా ఎక్కువ చేస్తుందని నమ్ముతున్నారు. 

మూడో సినిమా జూనియర్‌ ఎన్టీఆర్‌ నటిస్తున్న 'దేవర’ సినిమా. బాలీవుడ్‌ నటి, శ్రీదేవి బోనీ కపూర్‌ ల కుమార్తె జాన్వీ కపూర్‌ ఇందులో కథానాయిక. కొరటాల శివ దర్శకుడు. ఈ సినిమా రెండు భాగాలుగా వస్తోంది, ఇందులో మొదటి భాగం ముందుగా అనుకున్న తేదీ ప్రకారం అయితే ఈపాటికి విడుదలైపోవాలి, కానీ కొన్ని అనివార్య కారణాల వలన ఈ సినిమా విడుదల దసరా పండగ సందర్భంగా అక్టోబర్‌ 10 కి వాయిదా వేశారు. 'ఆర్‌ఆర్‌ఆర్‌’ సినిమా తరువాత ఎన్టీఆర్‌ చేస్తున్న పాన్‌ ఇండియా సినిమా ఇదే. బాలీవుడ్‌ నటుడు సైఫ్‌ అలీ ఖాన్‌ ఇందులో ప్రతినాయకుడి పాత్ర పోహిస్తున్నారు. ఈ సినిమా విడుదలకి ఇంకా చాలా సమయం వున్నా, ఇది ఎన్టీఆర్‌ కి ఒక ప్రతిష్టాత్మక చిత్రంగా వుండబోతోంది. తెలుగులో కాకుండా పాన్‌ ఇండియా లెవెల్లో అతని స్టామినా ఏంటో ఈ సినిమా ద్వారా నిరూపితం అవుతుంది కాబట్టి, ఈ సినిమాపై భారీ అంచనాలున్నాయి.

ఇక నాలుగో సినిమా రామ్‌ చరణ్‌, దర్శకుడు శంకర్‌ ల కలయికలో వస్తున్న 'గేమ్‌ చేంజర్‌’. ఈ సినిమా విడుదల తేదీ ఇంకా ప్రకటించలేదు, కానీ ఈ సంవత్సరమే విడుదలవుతుందని మాత్రం అంటున్నారు. ఈ సినిమా చిత్రీకరణ మొదలుపెట్టి రెండు సంవత్సరాలకి పైగా అవుతున్నా ఇంకా జరుగుతూనే వుంది. ఈ సినిమాలో కియారా అద్వానీ కథానాయిక, కాగా ఈ సినిమాలో అంజలి, జయరాం, ఎస్‌.జె.సూర్య, శ్రీకాంత్‌, సముద్రఖని, నవీన్‌ చంద్ర, సునీల్‌ ఇలా చాలామంది నటీనటులు వున్నారు. శంకర్‌ ఈ సినిమాతోపాటుగా కమల్‌ హాసన్‌ ప్రధాన పాత్ర పోషిస్తున్న 'భారతీయుడు 2’ సినిమాకూడా చిత్రీకరణ చెయ్యాల్సి రావటంవలన ఈ సినిమా చిత్రీకరణలో జాప్యం జరిగింది అని అంటున్నారు. ఈ సినిమాకి నిర్మాత దిల్‌ రాజు, అతని నిర్మాణంలో చిత్రీకరణ కోసం చాలా ఎక్కువ సమయం తీసుకున్న సినిమా ఈ 'గేమ్‌ చేంజర్‌’ మాత్రమే అని అంటున్నారు. ఈ సినిమా బ్జడెట్‌ సుమారు రూ.300 కోట్లు ఉండొచ్చు అని అంచనా వేస్తున్నారు. ఈ సినిమా వ్యాపారం ఇంకా ముగియలేదని, ఈ సినిమా విడుదల తేదీ ఖరారైతే అప్పుడు వ్యాపారలావాదేవీలు పూర్తవచ్చు అని అంటున్నారు. ఈ నాలుగు పెద్ద సినిమాలు ఈ సంవత్సరమే విడుదలవుతున్నాయి, ఈ సినిమాలపై వేలకోట్ల రూపాయల వ్యాపారం జరగబోతోంది. అలాగే పరిశ్రమ మనుగడ కూడా ఈ నాలుగు సినిమాలపై వుంది.

ఇంకా చదవండి: 'తలైవా' జీవితం ఆధారంగా చిత్రం!